Hukumar zaben Kano ta kayyade kudaden tsayawa takara

Hukumar Zabe Mai Zaman Kanta ta Jihar Kano ta bukaci ‘yan takarar shugabannin kananan hukumomi su biya naira miliyan 10, Kansiloli za su biya miliyan 5 a matsayin kudin fom na tsayawa takara wanda za'a gudanar ranar 30 ga watan Nuwamba a jihar.

Shugaban hukumar Farfesa Sani Lawan Malumfashi, ne ya bayyana haka yayin gabatar da ka’idojin zabe da jadawalin zaben ga wakilan jam’iyyun siyasa a hedikwatar hukumar a ranar Alhamis.

Ya bayyana cewa dan takarar da ke neman kujerar shugabancin karamar hukuma dole ne ya biya Naira miliyan 10 domin samun cancantar shiga zaben, yayin da dan takarar kansila zai biya Naira miliyan 5.

Malumfashi ya bayyana cewa ka’idojin sun fayyace duk batutuwan cancanta da rashin cancantar ‘yan takara.